వెర్టిగో & బ్యాలెన్స్ క్లినిక్

కళ్ళు తిరగడం, తల తిరుగుడు, తూలుడు – కారణం తెలుసుకుని సరైన చికిత్స.

వెర్టిగో అంటే ఏమిటి?

మీరు కదలకుండా ఉన్నా, మీరు లేదా మీ చుట్టూ ఉన్నవి తిరుగుతున్నట్లు అనిపించడాన్ని వెర్టిగో అంటారు. ఇది ఒక వ్యాధి కాదు – ఒక లక్షణం. తల తేలికగా అనిపించడం, మైకం, నడకలో తూలుడు వంటివి కూడా బ్యాలెన్స్ సమస్యలే.

మన బ్యాలెన్స్ మూడు వ్యవస్థల మీద ఆధారపడి ఉంటుంది – లోపలి చెవి, కళ్ళు, పాదాల/కీళ్ళ స్పర్శ. ఈ సంకేతాలను మెదడు కలిపి అర్థం చేసుకుంటుంది. వీటిలో ఏది సరిగా పనిచేయకపోయినా తల తిరుగుతుంది.

సాధారణ కారణాలు

లోపలి చెవి కారణాలు (ఎక్కువ సాధారణం)

BPPV (పొజిషనల్ వెర్టిగో) – పడుకున్నప్పుడు, పక్కకు తిరిగినప్పుడు లేదా పైకి చూసినప్పుడు కొద్దిసేపు గిర్రున తిరగడం.
వెస్టిబ్యులర్ న్యూరైటిస్ / లాబిరింథైటిస్ – జలుబు/జ్వరం తర్వాత అకస్మాత్తుగా వచ్చే తీవ్రమైన వెర్టిగో.
మెనియర్స్ వ్యాధి – వెర్టిగో దాడులతో పాటు ఒక చెవిలో బరువు, శబ్దం, వినికిడి తగ్గడం.
వెస్టిబ్యులర్ మైగ్రేన్ – తలనొప్పితో లేదా తలనొప్పి లేకుండా మళ్ళీ మళ్ళీ కళ్ళు తిరగడం.

ఇతర కారణాలు

బీపీ తక్కువ లేదా ఎక్కువ కావడం, లేచినప్పుడు బీపీ పడిపోవడం
షుగర్ తగ్గడం, రక్తహీనత, నీరసం
కొన్ని మందుల ప్రభావం
ఆందోళన, ఒత్తిడి
అరుదుగా – పక్షవాతం వంటి మెదడు సమస్యలు (ఇవి అత్యవసరం)

ఎప్పుడు డాక్టర్‌ను కలవాలి?

తల తిరుగుడు మళ్ళీ మళ్ళీ వస్తుంటే
కొన్ని రోజులైనా తగ్గకపోతే
దానితో పాటు వినికిడి తగ్గడం, చెవిలో శబ్దం లేదా చెవి బరువు ఉంటే
పడిపోయినా లేదా పడిపోతామనే భయం ఉన్నా
రోజువారీ పనులు, ప్రయాణం, ఉద్యోగంపై ప్రభావం చూపుతుంటే

పరీక్షలు ఎందుకు ముఖ్యం?

తల తిరుగుడుకు కారణం వేర్వేరుగా ఉండవచ్చు, కానీ లక్షణాలు ఒకేలా అనిపిస్తాయి. ఉదాహరణకు BPPVకి తల కదలికల చికిత్స అవసరం – మందులు మాత్రమే వాడితే తగ్గకపోవచ్చు. ఏ చెవి, ఏ భాగం ప్రభావితమైందో పరీక్షల ద్వారా తెలుసుకుంటేనే సరైన చికిత్స సాధ్యం.